POSBEKASI.COM | BEKASI – Kita rindu bet ama nyeng namanya suara kodok bancet pas mo magerib dari pinggiran galengan sawah,suara kodok belentung pas ari abis ujan dan nyeng kangen bangat ama suara nyanyian Tonggeret dari batang pu-un asem gede.
Abis sembahyang Maghrib kita pada ngumpul ama keluarga ngeriung di bale, sambil nyocol kukusan gadung ama gula merah,kaga nonton tivi kaya sekarang ge pada seneng aja,nyeng ada uman radio noble dua band entuh go udah di bungsel ama karet, entuh suara bang Bens nyanyi ama Ida Royani kedengeran dari radio butut tapi berasa nikmat ajah kaga pada nyeng ngeresulah.
Kalo kita tidur malem berasa nikmat dengerin suara nyanyian kodok belentung dari belakang rumah dan nyanyian suara jangkrik pada ngerik dari kolong bale, kalo udah denger suara nyeng begituan tidur jadi tibra, pules kaga pake kipas angin go kaga kegerahan.
Kalo tidur rada ngelekeb di dalem kita pindah keluar belonjoran diatas bale, meleding kaga pake baju entuh nyamk romanah kaga mao nemplok gegara ada angin nyeng betiup dari gembelnya pepu-unan sekitar rumah.
Bagen dah kalo ujan pada nyeblok, sendal lili pada manting melengso kena becekan tapi entuh malem kalo abis ujan suasana berasa adem,bantal kapuk berasa anget walaupun tibang ditidur diatas tiker pandan awak kita kaga berasa pegel malah pada sehat dan nyaman, entuh genteng pada bocor,aernya tempias kemuka lah entuh bocah tidur kaga begeming pisan ngorok lagi ampe ileran.
Kampung kita dulu tinggal cerita, minum kaga beli kaya sekarang, sumur aernya bening tinggal nimba, dimasak aernya ditaro di kendi pagi diisi entuh siang aer udah berasa adem kaya aer dan bikin sehat. Bocah sekarang mah kaga kenal kendi ama tempayan kenalnya aer galonan ama kulkasan ,kiatan nya doang seger dan bening padahal au dah sehat apa kaga nyeng penting instan.*
Bang ILok