POSBEKASI.COM | BEKASI – Dulu kalo ada Layar tancep,malem nya mo nonton,siangnya kita udah ngimpleng duluan bahasa keren nya survey dulu, biar ketauan pelem nya bakal rame apa kaga.
Kaga seru kalo kaga diliat dulu, soalnya ntuh jadi bahan cerita buat temen-temen, ngelongok pelem alias ngeliat tuh kaleng rol pelem emang udah jadi kesukaan bocah, karena dari bungkus kaleng ntuh bisa ketahuan pelem apa aja yang mo diputar nanti malam, dikalengnya nama judul film biasanya disingkat Saber (satria bergitar), PBK (Pitung beraksi kembali) walau singkatan nya rada ribed tapi ntuh bocah tau aja apa singkatannya. Abis Maghrib ntuh bocah udah pada nyamper kaen sarung diiket di pinggang, biar bocah dulu pada tukang nonton tapi yang namanya ngaji mah kaga ketinggalan kata ustad. “Makan beton dirumah uwak aji, rasanya enak,kalo nonton belon ngaji peginya ditawain kuntilanak!” wah bongganan ah ntuh bocah jadi pada mengkered ah, ngaji dulu dah baru nonton.
Abis ngaji dan sembahyang isya berangkat ntuh bocah nonton, ampe tontonan pelem belon main,masing flat lagu Mansyur S, bocah udah siap bawa ulad buat netek daon pisang buat sarap duduk, nyeng bawa duit mampir dulu ke tukang boleneng,makan boleneng dua bungkus digelar di atas daon pisang dimakan tujuh orang,walau kebagian sarang dikit tapi resep bener dah.
KLIK : Gerimis Desember
Tukang pelem ngetes proyektor tuh bocah pada nyula ada aja nyeng dialungin biar kesorot,kaen sarung,peci ampe sendal lily dialungin, maklum layar tancep jaman dulu mah masang nya tinggi jadi bocah kaga bisa ngeronjat layar.
Lampu ditarub pelem dimatiin wah tanda bahwa pelem segera diputer,satu pelem, dua pelem, pelem ketiga ntuh bocah mulai pada ngelenggut,mulain dah ada nyeng rebahan di daon pisang,kalo tidur musti gantiin biar kalo ada nyeng gerebeg bikin onar bocah ada nyeng bangunin.
Biasanya orang pada gerebeg kalo pelem nya putus mulu atawa ada nyeng kalah maen dadu kaga terima ntuh bikin keributan atu bahasa dulunya gerebeg. Pelem abis bocah belon berani pulang nunggu belebat dulu, iseng masing gelap,ntuh bocah pada bakarin sampah sambil nuturin duit orang yang pada jatoh pas lagi asyik nonton, biasanya ada aja duit yang jatoh dan bocah suka nemu mangkanya jadi keranjingan ngobor duit pake sampah bekas tontonan.
Belebat di belah betan nongol betanda ari mo terang ntuh bocah baru pada mingser pulang, di jalanan pada cewoh ngomongin pelem semalem….
Oleh: Bang ILok